熱 線 女 郎

先本月始，本小姐在公司時需多聽一條熱線。此熱線娛樂無窮，好幾次差點累本小姐失笑於人前，幸好自制力強；惟不明白何解這個電話機上沒有MUTE鍵。

例一
熱心市民：請問係咪問XXXX比賽？
我：係。
熱心市民：我想問呢．．．嘻嘻．．我想呢．．．嘻嘻嘻．．．好好笑呀．．．
我：喂，喂，先生．．．
熱心市民：嘻嘻．．喺度呀。
我：請問咩事呢？
熱心市民：哈哈哈（完全喪笑），都係一間先再打黎．．．哈哈哈哈（失控中）
我：．．．．．．哦，好丫，拜拜。

例二
熱心市民：喂，六張郵票即係咩意思呀？
我：即係設計六枚郵票囉。
熱心市民：六張．．即係咩呀？
我：六張即係六個囉先生。
熱心市民：我夠知啦，六張即係咩呀？
我：先生，不如你講清楚你條問題丫（頂，問好d啦傻仔）
熱心市民：咁都唔清楚？六張郵票即係咩意思呀？
我：即係咁咁咁咁咁（講一次遊戲規則）。明唔明呢先生？（唔明我都幫你唔到）
熱心市民：哦～下次你寫好d嘛（仲要話我），搞到我一頭霧水（大家咁話）。嘟──

例三
熱心市民：小姐，我而家喺紅磡，點去電台呀？
我：嗯，你可以搭火車去九龍塘再轉小巴架～
熱心市民：火車．．．邊條線？
我：（？）往羅湖方向，紅磡啦旺角啦跟住就到九龍塘。
熱心市民：吓？咁遠？！（玩野呀你）要搭幾多個站話？
我：小姐呀，不如你問吓著黃衫嘅職員丫，佢地會教你架喇。
熱心市民：你又話你係熱線？都唔識教人．．．
我：（O晒咀）哦，唔好意思呀。

例四
熱心市民：d郵票用相得唔得？
我：我地唔接受純粹照片的作品，因為唔係攝影比賽。
熱心市民：咁如果將好多張緊黐埋成一張呢（！）？
我：總之係原創嘅，我地都接受。
熱心市民：影相咪原創囉！而家即係水禾田都唔參加得（！！）？！
我：其實你可以睇吓有冇d攝影比賽可以參加吓。呢度係郵票設計比賽。
熱心市民：水禾田都唔參加得呀！
我：先生先生，如果水和田佢設計咗郵票都可以參加架，我地好歡迎。
熱心市民：哦，拜拜。

例五
熱心市民：如果我畫毛澤東，可唔可以？
我：我諗要配合返個比賽主題啦。
熱心市民：你有冇聽清楚我問咩呀？我問畫毛澤東得唔得呀？
我：如果你覺得呢個設計配合到個主題就okay冇問題架喇。
熱心市民：你咁講即係唔得啦！
我：（天呀！我邊有講過呀大佬！）我冇講過唔得啵先生。
熱心市民：拿，你咁講對毛主席唔住呀！冇佢，你冇飽飯食；冇佢，中港台都唔係而家咁（可圈可點）；冇佢，我地中國唔會咁強大（are u sure？）！你知唔知呀，毛主席佢呀．．．（下刪一億字論述毛澤東的「偉大之處」，並企圖強迫本小姐接受之。）你明唔明呀？佢好偉大，偉大到你d仔仔囡囡子子孫孫千秋萬代都要頌讚佢！
我：唔好意思呀，我冇小朋友架。
熱心市民：（！）（沉默半晌）喂，話時話，如果我交作品，你係咪揀我做冠軍先？
我：（你都黐線）對唔住，我地係好嚴謹，呢個比賽係會有一個黎自六個機構或部門組成嘅八人評審委員會去選得獎作品架。
熱心市民：車，咪又係得你一個（？）！
我：（咪咁天真啦）先生，請你聽清楚，係有八個人。
熱心市民：一樣啦，你同佢地講囉，嗌佢地全部人揀我做冠軍，唔係我唔會交我份作品（超！懶巴閉啦你）。
我：唔好意思，我係唔會咁做。而先生你都有自由選擇你參唔參加比賽囉。
熱心市民：乜咁煩架！（到底邊個煩呢）算啦，我交你要睇喎（你交先算啦）。
我：請問仲有咩可以幫到你？
熱心市民：嗯（佢真係似有認真思考喎）．．．冇喇，唔該晒你。願毛主席祝你身體健康！
我：（哇哈哈哈哈哈哈哈哈，瘋狂忍笑中）多謝，你都係！
熱心市民：記住毛主席係神，佢會幫到你（哦？又話大陸係個無神論國家？！）。
我：拜拜。（XDDDDDDDDD）

＋＋＋＋＋＋＋＋＋＋

老闆話這比賽反應非常熱烈（我知丫，看上文已知一二），已將截止日期延了兩個星期，所有有趣的對話將陸續有來。多謝各位熱心市民豐富本小姐每日dull爆的文件生活。